MPT ၏ GSM တယ်လီကွန်းဝန်ဆောင်မှုများကို မူလအတိုင်း ပြန်လည်သုံးစွဲနိုင်ကြောင်း မိုဘိုင်းလ်သုံးစွဲသူများသို့ အသိပေးခြင်းနှင့် အဆင်မပြေမှုများအတွက် နိုင်ငံတစ်ဝန်းရှိ MPT သုံးစွဲသူများအားလုံးအတွက် 200MB + 15 mins ကိုပြန်လည်ထည့်သွင်း​ပေးသွားမည်

(ရန်ကုန်၊ ၂၀၂၃ ခုနှစ်၊ ဖေဖော်ဝါရီလ ၁၁ ရက်)- MPT အနေဖြင့် ဖေဖော်ဝါရီလ (၇)ရက်မှ (၈) ရက်အတွင်း ဖြစ်ပွားခဲ့သည့် GSM တယ်လီကွန်း ဝန်ဆောင်မှုအခက်အခဲများကို ဖြေရှင်းပြီးဖြစ်ပါသဖြင့် ၂၀၂၃ခုနှစ်၊ဖေဖော်ဝါရီလ (၈)ရက် နံနက် ၁၀:၀၉ နာရီအချိန်မှစ၍ MPT ၏ GSM တယ်လီကွန်းဝန်ဆောင်မှုများအားလုံးကို မူလအတိုင်း ပြန်လည်အသုံးပြုနိုင်ပြီဖြစ်ပါသည်။ ကျန်ရှိနေသေးသော ဝန်ဆောင်မှုများကို သုံးစွဲသူများထံ အမြန်ဆုံး ပြန်လည်ပေးအပ်နိုင်ရန် ကြိုးစားဆောင်ရွက်လျက်ရှိပါသည်။ ဖြစ်ပေါ်ခဲ့သည့် အဆင်မပြေမှုများအတွက် အနူးအညွတ်တောင်းပန်သည့်အနေနှင့် MPT မှ သုံးစွဲသူများကို ​ဒေတာ 200MB  နှင့် MPT အချင်းချင်း 15 မိနစ် ဖုန်း​ခေါ်ဆိုမှုအား ထည့်သွင်းပေးသွားမည်ဖြစ်ပါသည်။ သုံးစွဲသူများသည် လက်​ဆောင်ကို ၇ ရက်သက်တမ်းဖြင့် အသုံးပြုနိုင်မည်ဖြစ်ပါသည်။ MPT အနေဖြင့် နိုင်ငံတစ်ဝန်းမှ သုံးစွဲသူများအတွက် တည်ငြိမ် ကောင်းမွန်သော ကွန်ရက် ဝန်ဆောင်မှုပေးနိုင်ရန် အစဥ်အမြဲကြိုးစားလျက်ရှိပြီး ဖြစ်ပေါ်ခဲ့သည့် အဆင်မပြေမှုများအတွက် အနူးအညွတ်တောင်းပန်အပ်ပါသည်။  MPT ကို စဥ်ဆက်မပြတ် အသုံးပြု​​နေသည့် နိုင်ငံတစ်ဝန်းမှ သုံးစွဲသူများအားလုံးကို ကျေးဇူးအထူးတင်ရှိပြီး “အတူလက်တွဲ အမြဲရှိမည်” ဟူသည့် ဆောင်ပုဒ်နှင့် အညီ ကြိုးစားဆောင်ရွက်သွားမည်ဖြစ်ပါသည်။